അവിനാഷ് പ്രകാശ് രചനയും സംവിധാനവും നിർവ്വഹിച്ച് നിരൂപക പ്രശംസ പിടിച്ചുപറ്റിയ തമിഴ് ചിത്രം 'നാങ്കൾ' ഒടിടി സ്ട്രീമിംഗിന് ഒരുങ്ങുന്നു. ഏറെ നാളത്തെ കാത്തിരിപ്പിനൊടുവിൽ ചിത്രം പ്രമുഖ ഒടിടി പ്ലാറ്റ്‌ഫോമായ സൺ നെക്സ്റ്റിലൂടെ ഏപ്രിൽ 10 മുതൽ പ്രേക്ഷകരിലേക്ക് എത്തും. 90-കളുടെ പശ്ചാത്തലത്തിൽ ഊട്ടിയിൽ നടക്കുന്ന മനോഹരമായ ഒരു 'കമിംഗ് ഓഫ് ഏജ്' ഡ്രാമയാണ് ഈ ചിത്രം.

കഴിഞ്ഞ വർഷം ഏപ്രിൽ 18-ന് തിയേറ്ററുകളിൽ എത്തിയ ചിത്രം പിന്നീട് ചില കാരണങ്ങളാൽ പിൻവലിച്ചിരുന്നു. തുടർന്ന് ഡിസംബർ 12-ന് വീണ്ടും പ്രദർശനത്തിനെത്തുകയും മികച്ച പ്രതികരണം നേടുകയും ചെയ്തു. കർക്കശക്കാരനായ ഒരു പിതാവിനും, അമ്മയുമായി വേർപിരിഞ്ഞു കഴിയുന്ന അദ്ദേഹത്തിന്റെ മൂന്ന് മക്കൾക്കും ഇടയിലുണ്ടാകുന്ന വൈകാരിക നിമിഷങ്ങളിലൂടെയാണ് സിനിമ സഞ്ചരിക്കുന്നത്. കുട്ടിക്കാലത്തെ നിഷ്കളങ്കതയും കൗമാരത്തിലെ മാറ്റങ്ങളും ചിത്രം വളരെ ഹൃദ്യമായി ആവിഷ്കരിക്കുന്നു.

മിഥുൻ വി, ഋത്വിക് എം, നിതിൻ ഡി, അബ്ദുൾ റാഫേ തുടങ്ങിയ യുവതാരങ്ങളാണ് ചിത്രത്തിൽ പ്രധാന വേഷങ്ങളിൽ എത്തുന്നത്. ഇവരെ കൂടാതെ സംവിധായകൻ അവിനാഷിന്റെ വളർത്തുനായ 'റോക്സി'യും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിച്ചിട്ടുണ്ട് എന്നത് ശ്രദ്ധേയമാണ്. ജി.വി.എസ് രാജുവാണ് ചിത്രത്തിന്റെ നിർമ്മാണം. സംവിധാനത്തിന് പുറമെ ചിത്രത്തിന്റെ ഛായഗ്രാഹകനും എഡിറ്ററും അവിനാഷ് പ്രകാശ് തന്നെയാണ്. വേദ് ശങ്കർ സുഗാവനം സംഗീതസംവിധാനം നിർവ്വഹിച്ചിരിക്കുന്നു. മികച്ച സംഭാഷണങ്ങളും ദൃശ്യഭംഗിയും കൊണ്ട് ശ്രദ്ധിക്കപ്പെട്ട ഈ കൊച്ചു ചിത്രം തമിഴ് സിനിമയിലെ വേറിട്ടൊരു കാഴ്ചാനുഭവമായിരിക്കും സമ്മാനിക്കുക. ഒടിടി റിലീസിനായുള്ള ഔദ്യോഗിക പോസ്റ്റർ ഇതിനോടകം തന്നെ സൺ നെക്സ്റ്റ് തങ്ങളുടെ സോഷ്യൽ മീഡിയ പേജുകളിലൂടെ പുറത്തുവിട്ടിട്ടുണ്ട്.