തമിഴ് സിനിമാ ലോകത്ത് നടനായും ഗായകനായും തിളങ്ങിയ ശിവകാർത്തികേയൻ ഇപ്പോൾ നിർമാതാവ് എന്ന നിലയിലും വൻ വിജയങ്ങൾ കൊയ്യുകയാണ്. ശിവകാർത്തികേയൻ പ്രൊഡക്ഷൻസിന്റെ ബാനറിൽ പുറത്തിറങ്ങിയ ഏറ്റവും പുതിയ ചിത്രം 'തായ് കിഴവി' ബോക്സ് ഓഫീസിൽ തകർപ്പൻ പ്രകടനമാണ് കാഴ്ചവെക്കുന്നത്. റിലീസ് ചെയ്ത് വെറും മൂന്ന് ദിവസങ്ങൾ പിന്നിടുമ്പോൾ ഞെട്ടിക്കുന്ന കളക്ഷൻ കണക്കുകളാണ് ചിത്രം സ്വന്തമാക്കിയിരിക്കുന്നത്.

ആഗോള ബോക്സ് ഓഫീസിൽ നിന്ന് ആദ്യ മൂന്ന് ദിനം കൊണ്ട് 20.78 കോടി രൂപയാണ് സിനിമ വാരിക്കൂട്ടിയത്. ഇതിൽ ഇന്ത്യയിൽ നിന്ന് മാത്രം 15.51 കോടി രൂപ ലഭിച്ചപ്പോൾ വിദേശ വിപണിയിൽ നിന്ന് 5.28 കോടി രൂപയും ചിത്രം നേടി. ഒരു കോമഡി ഡ്രാമ വിഭാഗത്തിൽപ്പെടുന്ന ഈ ചിത്രം സംവിധാനം ചെയ്തിരിക്കുന്നത് ശിവകുമാർ മുരുഗേശൻ ആണ്.

പ്രശസ്ത നടി രാധിക ശരത്കുമാറിന്റെ അസാമാന്യ പ്രകടനമാണ് സിനിമയുടെ പ്രധാന ആകർഷണം. രാധികയുടെ കരിയറിലെ തന്നെ ഏറ്റവും മികച്ച വേഷങ്ങളിൽ ഒന്നാണിതെന്നും, അവരുടെ സ്ക്രീൻ പ്രസൻസും ട്രാൻസ്ഫോർമേഷനുമാണ് സിനിമയെ മുന്നോട്ട് നയിക്കുന്നതെന്നും പ്രേക്ഷകർ അഭിപ്രായപ്പെടുന്നു. പാഷൻ സ്റ്റുഡിയോസും ശിവകാർത്തികേയൻ പ്രൊഡക്ഷൻസും സംയുക്തമായാണ് ചിത്രം നിർമിച്ചിരിക്കുന്നത്. നിവാസ് കെ. പ്രസന്നയാണ് സംഗീത സംവിധാനം.

'തായ് കിഴവി'യുടെ വൻ വിജയത്തിന് പിന്നാലെ സംവിധായകൻ ശിവകുമാർ മുരുഗേശൻ ഒരുക്കുന്ന അടുത്ത ചിത്രത്തിൽ ശിവകാർത്തികേയൻ തന്നെയാണ് നായകൻ. 'സേയോൺ' എന്ന് പേരിട്ടിരിക്കുന്ന ഈ ചിത്രം കമൽഹാസന്റെ രാജ് കമൽ ഫിലിംസ് ഇന്റർനാഷണലാണ് നിർമിക്കുന്നത്. നിലവിൽ തായ് കിഴവിക്ക് ലഭിക്കുന്ന മികച്ച മൗത്ത് പബ്ലിസിറ്റി വരും ദിവസങ്ങളിലും കളക്ഷൻ വർധിപ്പിക്കുമെന്നാണ് സിനിമാ ലോകത്തെ വിലയിരുത്തൽ.