ജിത്തു ജോസഫിന്റെ മിന്നും വിജയം നേടിയ 'ദൃശ്യം' ഫ്രാഞ്ചൈസിയുടെ ഹിന്ദി പതിപ്പായ 'ദൃശ്യം: ദി കൺക്ലൂഷൻ' എന്ന ചിത്രത്തെയും അതിന്റെ അണിയറപ്രവർത്തകരെയും അഭിനന്ദിച്ച് മലയാളത്തിന്റെ പ്രിയതാരം മോഹൻലാൽ. ഒക്ടോബർ 2-ന് തിയേറ്ററുകളിലെത്തിയ ചിത്രം ആഗോള ബോക്സ് ഓഫീസിൽ 500 കോടി ക്ലബ്ബിലേക്ക് കുതിക്കുന്നതിനിടയിലാണ് ലാലേട്ടന്റെ ഈ പ്രശംസ.

അഭിഷേക് പഥക് സംവിധാനം ചെയ്ത ചിത്രത്തെക്കുറിച്ച് പ്രൊഡക്ഷൻ ബാനർ പങ്കുവെച്ച വീഡിയോ സന്ദേശത്തിലാണ് മോഹൻലാൽ തന്റെ സന്തോഷം അറിയിച്ചത്. "ഞാൻ ഈ സിനിമ കണ്ടു. ഏറെ പ്രിയപ്പെട്ട ഈ സിനിമായാത്ര അവസാനിപ്പിച്ച രീതി എന്നെ ഏറെ ആകർഷിച്ചു. അഭിഷേക് പഥക്, അജയ് ദേവ്ഗൺ, കൂടാതെ ഇതിന്റെ മുഴുവൻ അണിയറപ്രവർത്തകർക്കും എൻ്റെ അഭിനന്ദനങ്ങൾ, വളരെ മനോഹരമായി ചെയ്തിരിക്കുന്നു," എന്ന് മോഹൻലാൽ വീഡിയോയിൽ പറഞ്ഞു.

വിജയ് സാൽഗോങ്കർ എന്ന കഥാപാത്രമായി അജയ് ദേവ്ഗൺ വീണ്ടും തിളങ്ങിയ ചിത്രത്തിൽ തബു, ശ്രിയ ശരൺ, ജയ്ദീപ് അഹ്‌ലാവത് തുടങ്ങിയ വൻ താരനിരയാണ് അണിനിരന്നത്. മോഹൻലാലിന്റെ അഭിനന്ദനത്തിന് നിർമ്മാതാക്കളും അജയ് ദേവ്ഗണും നന്ദി അറിയിച്ചിട്ടുണ്ട്