യഷ് രാജ് ഫിലിംസിന്റെ സ്പൈ യൂണിവേഴ്സിലെ ഏറ്റവും പുതിയ ചിത്രമായ 'ആൽഫ'യുടെ ആവേശമുണർത്തുന്ന ടീസർ പുറത്തുവിട്ടു. ആലിയ ഭട്ട്, ഷർവാരി എന്നിവർ കേന്ദ്രകഥാപാത്രങ്ങളെ അവതരിപ്പിക്കുന്ന ഈ ആക്ഷൻ ചിത്രത്തിന്റെ ടീസർ ബുധനാഴ്ചയാണ് അണിയറപ്രവർത്തകർ പുറത്തുവിട്ടത്. 'ദി റെയിൽവേ മെൻ' എന്ന വെബ് സീരീസിലൂടെ ശ്രദ്ധേയനായ ശിവ് റവെയ്‌ലാണ് ചിത്രം സംവിധാനം ചെയ്യുന്നത്.

ആലിയ ഭട്ടിന്റെ കഥാപാത്രം തന്റെ 18-ാം ജന്മദിനം ബോബി ഡിയോൾ അവതരിപ്പിക്കുന്ന 'ബാബ' എന്ന മെന്റർക്കൊപ്പം ഒരു റെസ്റ്റോറന്റിൽ വെച്ച് ആഘോഷിക്കുന്ന രംഗത്തോടെയാണ് ടീസർ ആരംഭിക്കുന്നത്.

'ആൽഫ' എന്ന എലൈറ്റ് അസ്സാസിൻ പ്രോഗ്രാമിനായി ബോബി ഡിയോൾ ആലിയയെ എങ്ങനെയാണ് പരിശീലിപ്പിച്ചതെന്ന് വ്യക്തമാക്കുന്ന അതിവേഗ ആക്ഷൻ രംഗങ്ങളാണ് പിന്നീട് ടീസറിലുള്ളത്. ബ്ലേഡുകൾ ഉപയോഗിച്ച് വില്ലന്മാരെ നേരിടുന്ന ആലിയ ഭട്ടിന്റെ തകർപ്പൻ അക്രോബാറ്റിക് ആക്ഷൻ സീക്വൻസുകൾ ടീസറിലെ പ്രധാന ആകർഷണമാണ്. എന്നാൽ ചിത്രത്തിലെ മറ്റ് പ്രധാന താരങ്ങളായ ഷർവാരിയുടെയോ അനിൽ കപൂറിന്റെയോ കഥാപാത്രങ്ങളെ ടീസറിൽ ഉൾപ്പെടുത്തിയിട്ടില്ല.

ആദിത്യ ചോപ്രയുടെ യാഷ് രാജ് ഫിലിംസ് നിർമ്മിക്കുന്ന ചിത്രത്തിന് സൗമിൽ ശുക്ലയും ശ്രീധർ രാഘവനുമാണ് തിരക്കഥയൊരുക്കിയിരിക്കുന്നത്. സംഭാഷണങ്ങൾ തയാറാക്കിയിരിക്കുന്നത് ഇഷിത മൊയ്ത്രയാണ്. വലിയ പ്രതീക്ഷകളോടെ എത്തുന്ന 'ആൽഫ' വരും മാസങ്ങളിൽ തിയേറ്ററുകളിലേക്ക് എത്തും. സിനിമയിലെ സ്ത്രീ കേന്ദ്രീകൃതമായ ഈ പുതിയ സ്പൈ ത്രില്ലർ വലിയൊരു ആക്ഷൻ വിരുന്നായിരിക്കുമെന്നാണ് ടീസർ നൽകുന്ന സൂചന.

പുറത്തുവന്ന ടീസർ കാണാം : Alpha Teaser