ചിത്രം 'അതിരടി' ബോക്സ് ഓഫീസിൽ വൻ കുതിപ്പ് തുടരുന്നു. റിലീസ് ചെയ്ത് വെറും ആറ് ദിവസങ്ങൾ പിന്നിടുമ്പോൾ ചിത്രം 51.62 കോടി രൂപയാണ് ആഗോളതലത്തിൽ സ്വന്തമാക്കിയത്. കുടുംബപ്രേക്ഷകരും യുവാക്കളും ഒരുപോലെ ഏറ്റെടുത്തതാണ് ചിത്രത്തിന്റെ ഈ വൻ വിജയത്തിന് പിന്നിലെ പ്രധാന ഘടകം.

ആദ്യ ദിനം മുതൽ മികച്ച പ്രതികരണം നേടിയ ചിത്രം പ്രവൃത്തിദിവസങ്ങളിലും മികച്ച കളക്ഷനാണ് നിലനിർത്തുന്നത്. ഇന്ത്യയിൽ നിന്ന് മാത്രം ഇതിനോടകം 29.87 കോടി രൂപ ഗ്രോസ് കളക്ഷൻ നേടിയപ്പോൾ, വിദേശ വിപണികളിൽ നിന്ന് 21.75 കോടി രൂപയും ചിത്രം സ്വന്തമാക്കി. അരുൺ അനിരുദ്ധൻ സംവിധാനം ചെയ്ത ഈ ആക്ഷൻ കോമഡി എന്റർടെയ്‌നർ, വാഴ 2, ആട് 3, പേട്രിയറ്റ് എന്നീ ചിത്രങ്ങൾക്ക് ശേഷം ഈ വർഷം 50 കോടി കടക്കുന്ന സിനിമയെന്ന നേട്ടവും കൈവരിച്ചു.

ചിത്രത്തിൽ ടൊവിനോ തോമസ് വില്ലൻ വേഷത്തിൽ എത്തുന്നതും ബേസിൽ ജോസഫിന്റെ മികച്ച പ്രകടനവുമാണ് പ്രേക്ഷകരെ ആകർഷിക്കുന്നത്. വിനീത് ശ്രീനിവാസനും ചിത്രത്തിൽ ഒരു പ്രധാന വേഷം കൈകാര്യം ചെയ്യുന്നുണ്ട്. മിന്നൽ മുരളിക്ക് ശേഷം ടൊവിനോയും ബേസിലും ഒന്നിക്കുന്ന ചിത്രം എന്ന നിലയിൽ വലിയ ഹൈപ്പോടെയാണ് അതിരടി തിയേറ്ററുകളിൽ എത്തിയത്.

കേരളത്തിലെ തിയേറ്ററുകളിൽ നിന്ന് മാത്രം ഏകദേശം 25 കോടിയോളം രൂപ ചിത്രം സ്വന്തമാക്കിയിട്ടുണ്ട്. മോഹൻലാൽ ചിത്രം 'ദൃശ്യം 3' തിയേറ്ററുകളിലേക്ക് എത്താനിരിക്കെ, നിലവിലെ മികച്ച പ്രേക്ഷക പ്രതികരണം വരും ദിവസങ്ങളിലും അതിരടിക്ക് കരുത്താകുമെന്നാണ് അണിയറപ്രവർത്തകരുടെ പ്രതീക്ഷ. ഒരു ചെറിയ ഇടവേളയ്ക്ക് ശേഷം മലയാള സിനിമയ്ക്ക് ബോക്സ് ഓഫീസിൽ ലഭിക്കുന്ന വലിയ ആശ്വാസമാണ് അതിരടിയുടെ വിജയം.