സംഗീത സംവിധായകനും നടനുമായ ജി.വി. പ്രകാശ് കുമാറിനെ കേന്ദ്രകഥാപാത്രമാക്കി നവാഗതനായ മരിയ രാജ ഇളഞ്ചേഴിയൻ സംവിധാനം ചെയ്ത 'ഹാപ്പി രാജ്' ആമസോൺ പ്രൈം വീഡിയോയിലൂടെ പ്രേക്ഷകരിലേക്കെത്തുന്നു. ഏപ്രിൽ 24-നാണ് ചിത്രം പ്രൈം വീഡിയോയിൽ സ്ട്രീമിംഗ് ആരംഭിക്കുക. തീയേറ്റർ റിലീസിന് ശേഷം കൃത്യമായ ഇടവേള കഴിഞ്ഞാണ് ചിത്രം ഡിജിറ്റൽ പ്ലാറ്റ്‌ഫോമിലെത്തുന്നത്.

ശ്രീ ഗൗരി പ്രിയ നായികയായെത്തുന്ന ചിത്രത്തിൽ പ്രശസ്ത നടൻ അബ്ബാസ് ഒരു നീണ്ട ഇടവേളയ്ക്ക് ശേഷം പ്രധാന വേഷത്തിൽ തിരിച്ചെത്തുന്നു എന്ന പ്രത്യേകതയുമുണ്ട്. ജോർജ് മരിയൻ, പ്രാർത്ഥന, ഗീത കൈലാസം, മധുരൈ മുത്തു തുടങ്ങിയവരാണ് മറ്റ് പ്രധാന താരങ്ങൾ. ആനന്ദരാജ് എന്ന ഹാപ്പി രാജിന്റെ ജീവിതയാത്രയും പ്രണയവും കുടുംബബന്ധങ്ങളുമാണ് ചിത്രത്തിന്റെ പ്രമേയം.

പല കാരണങ്ങളാൽ സാമൂഹികമായ ഒറ്റപ്പെടലുകളിൽ നിന്ന് രക്ഷപ്പെടാൻ ബെംഗളൂരുവിലേക്ക് എത്തുന്ന രാജ്, അവിടെ വെച്ച് കാവ്യയെ കണ്ടുമുട്ടുന്നതും തുടർന്നുണ്ടാകുന്ന സംഭവവികാസങ്ങളുമാണ് ചിത്രം ഹാസ്യത്തിന്റെ അകമ്പടിയോടെ അവതരിപ്പിക്കുന്നത്. ജസ്റ്റിൻ പ്രഭാകരന്റെ സംഗീതവും മദൻ ക്രിസ്റ്റഫറിന്റെ ഛായഗ്രഹണവും ചിത്രത്തിന് കരുത്തേകുന്നു.

മാർച്ച് 27-ന് തീയേറ്ററുകളിൽ എത്തിയ ചിത്രത്തിന് മികച്ച നിരൂപക പ്രശംസ ലഭിച്ചിരുന്നു. പ്രത്യേകിച്ചും രണ്ടാം പകുതിയിലെ കോമഡി രംഗങ്ങളും ജോർജ് മരിയന്റെ പ്രകടനവും ഏറെ ശ്രദ്ധിക്കപ്പെട്ടു. കുടുംബപ്രേക്ഷകരെയും യുവാക്കളെയും ഒരുപോലെ ആകർഷിക്കുന്ന ഒരു കംപ്ലീറ്റ് പാക്കേജായാണ് 'ഹാപ്പി രാജ്' ഒരുക്കിയിരിക്കുന്നത്. ജയവർദ്ധനൻ ആണ് ചിത്രം നിർമ്മിച്ചിരിക്കുന്നത്. സിനിമ തീയേറ്ററിൽ കാണാൻ സാധിക്കാത്തവർക്ക് ഏപ്രിൽ 24 മുതൽ ആമസോൺ പ്രൈമിലൂടെ ചിത്രം ആസ്വദിക്കാം.