മലയാളത്തിലെ യുവതാരങ്ങളിൽ ശ്രദ്ധേയനായ നസ്ലെനെ കേന്ദ്ര കഥാപാത്രമാക്കി അഭിനവ് സുന്ദർ നായക് സംവിധാനം ചെയ്ത 'മോളിവുഡ് ടൈംസ്' തിയേറ്ററുകളിൽ വൻ കുതിപ്പ് തുടരുന്നു. കഴിഞ്ഞ വെള്ളിയാഴ്ച റിലീസിനെത്തിയ ചിത്രം ആഗോള ബോക്സ് ഓഫീസിൽ നിന്ന് അഞ്ചുദിവസം കൊണ്ട് 15 കോടി രൂപയാണ് വേൾഡ് വൈഡ് കളക്ഷനായി സ്വന്തമാക്കിയത്. സിനിമാ പ്രേമികളുടെയും പ്രേക്ഷകരുടെയും മികച്ച പ്രതികരണങ്ങളോടെ തിയേറ്ററുകളിൽ ചിത്രം ഹൗസ്ഫുല്ലായി പ്രദർശനം തുടരുകയാണ്.

ഒരു സിനിമാ മോഹിയുടെ സ്വപ്നങ്ങളും അയാൾക്ക് നേരിടേണ്ടി വരുന്ന പ്രതിസന്ധികളും വീഴ്ചകളുമൊക്കെയാണ് ചിത്രം പങ്കുവെക്കുന്നത്. സംവിധായകൻ അഭിനവ് സുന്ദർ നായകിന്റെ സ്വന്തം ജീവിതത്തിലെ ആത്മകഥാംശങ്ങൾ ഉൾക്കൊള്ളിച്ചാണ് ചിത്രം ഒരുക്കിയിരിക്കുന്നത് എന്ന് അദ്ദേഹം പ്രൊമോഷൻ അഭിമുഖങ്ങളിൽ വ്യക്തമാക്കിയിരുന്നു. ചിത്രത്തിലെ നസ്ലെന്റെ പ്രകടനം താരത്തിന്റെ കരിയറിലെ തന്നെ ഏറ്റവും മികച്ച പെർഫോമൻസ് ആണെന്നാണ് പ്രേക്ഷക വിലയിരുത്തൽ. 'മുകുന്ദൻ ഉണ്ണി അസോസിയേറ്റ്‌സ്' എന്ന സൂപ്പർഹിറ്റ് ചിത്രത്തിന് ശേഷം അഭിനവ് സുന്ദർ നായക് സംവിധാനം ചെയ്യുന്ന ചിത്രം കൂടിയാണിത്.

നസ്ലെനൊപ്പം സംഗീത് പ്രതാപ്, ഷറഫുദ്ദീൻ, ജഗദീഷ്, റോഷൻ ഷാനവാസ്, അപ്പുണ്ണി ശശി, പ്രശാന്ത് അലക്‌സാണ്ടർ, ബാലചന്ദ്രൻ ചുള്ളിക്കാട്, അൽത്താഫ് സലീം, ഗോപിക രമേശ്, രാജേഷ് മാധവൻ എന്നിവരടങ്ങുന്ന ഒരു വലിയ താരനിര തന്നെ ചിത്രത്തിലുണ്ട്. കൂടാതെ മലയാളത്തിലെ രണ്ട് പ്രമുഖ താരങ്ങൾ അതിഥി വേഷത്തിലും എത്തുന്നുണ്ട്.

ആഷിക് ഉസ്മാൻ പ്രൊഡക്ഷൻസിന്റെ ബാനറിൽ ആഷിക് ഉസ്മാൻ നിർമിച്ച ഈ ചിത്രത്തിന്റെ തിരക്കഥ രാമു സുനിലിന്റേതാണ്. വിശ്വജിത്ത് ഒടുക്കത്തിൽ ക്യാമറയും ജേക്‌സ് ബിജോയ് സംഗീതവും നിർവഹിച്ചിരിക്കുന്നു. നിധിൻ രാജ് അരോളും സംവിധായകൻ അഭിനവും ചേർന്നാണ് ചിത്രത്തിന്റെ എഡിറ്റിങ് പൂർത്തിയാക്കിയത്. ഒരു മികച്ച തിയേറ്റർ അനുഭവം സമ്മാനിക്കുന്ന 'മോളിവുഡ് ടൈംസ്' വരും ദിവസങ്ങളിലും ബോക്സ് ഓഫീസിൽ വലിയ മുന്നേറ്റം നടത്തുമെന്നാണ് സൂചനകൾ.