തെലുങ്ക് സൂപ്പർ താരം നാനി നായകനാകുന്ന ബിഗ് ബജറ്റ് ചിത്രം 'ദി പാരഡൈസ്' എന്ന സിനിമയിലെ രണ്ടാമത്തെ സിംഗിൾ 'യെഷനഗുല' പുറത്തിറങ്ങി. നാനിക്കൊപ്പം കീർത്തി സുരേഷ് ഒരുമിച്ച് അഭിനയിക്കുന്ന ഈ ഗാനം അതിവേഗം സോഷ്യൽ മീഡിയയിൽ തരംഗമാകുകയാണ്. 'നേനു ലോക്കൽ', 'ദസറ' എന്നീ വൻ വിജയ ചിത്രങ്ങൾക്ക് ശേഷം നാനിയും കീർത്തി സുരേഷും വീണ്ടും ഒന്നിക്കുന്നു എന്ന പ്രത്യേകതയും ഈ ഗാനത്തിനുണ്ട്.

തമിഴിലെ പ്രമുഖ സംഗീത സംവിധായകൻ അനിരുദ്ധ് രവിചന്ദർ ആണ് ഈ ഹൈ-എനർജി ഡാൻസ് നമ്പറിന് ഈണം പകർന്നിരിക്കുന്നത്. പ്രഭ, ജംഗി റെഡ്ഡി എന്നിവർ ചേർന്ന് ആലപിച്ചിരിക്കുന്ന ഗാനത്തിന്റെ വരികൾ തയ്യാറാക്കിയത് കസർള ശ്യാമാണ്. യു.എസ്.എയിലെ ഡാളസിൽ നടന്ന അനിരുദ്ധിന്റെ സംഗീത നിശയിൽ വെച്ചാണ് ഗാനം ഔദ്യോഗികമായി പുറത്തിറക്കിയത്. നാനിയും ഈ ചടങ്ങിൽ അപ്രതീക്ഷിതമായി പങ്കെടുത്ത് ആരാധകരെ അമ്പരപ്പിച്ചു.

'ദസറ' എന്ന സൂപ്പർഹിറ്റ് ചിത്രത്തിന് ശേഷം സംവിധായകൻ ശ്രീകാന്ത് ഒഡെലയും നാനിയും വീണ്ടും കൈകോർക്കുന്ന ചിത്രമാണ് 'ദി പാരഡൈസ്'. 'ജാഡൽ' എന്ന കഥാപാത്രമായാണ് നാനി ഇതിൽ എത്തുന്നത്. മുൻപ് പുറത്തിറങ്ങിയ ചിത്രത്തിലെ ആദ്യ ഗാനമായ 'ആയാ ഷേർ' യൂട്യൂബിൽ 200 മില്യണിലധികം കാഴ്ചക്കാരെ നേടി വൻ തരംഗമായിരുന്നു. അതിനു പിന്നാലെ എത്തിയ 'യെഷനഗുല'യും ആഗോളതലത്തിൽ വലിയ തരംഗം സൃഷ്ടിക്കുമെന്നാണ് പ്രതീക്ഷ.

മോഹൻ ബാബു, രാഘവ് ജൂയൽ, കയാദു ലോഹർ, സൊണാലി കുൽക്കർണി തുടങ്ങിയ വൻ താരനിരയും ചിത്രത്തിൽ പ്രധാന വേഷങ്ങളിലെത്തുന്നുണ്ട്. സി.എച്ച് സായി ഛായാഗ്രഹണവും നവീൻ നൂലി എഡിറ്റിംഗും നിർവ്വഹിക്കുന്നു. എസ്‌.എൽ.വി സിനിമാസിന്റെ ബാനറിൽ സുധാകർ ചെറുകുറിയാണ് ചിത്രം നിർമ്മിക്കുന്നത്. ചിത്രം സെപ്റ്റംബർ 24-ന് തിയേറ്ററുകളിലെത്തും.