ലോകസിനിമയിലെ ഏറ്റവും വലിയ പുരസ്കാര വേദിയായ ഓസ്‌കർ വേദിയിൽ ഒരിക്കൽ കൂടി തിളങ്ങാൻ ഇന്ത്യൻ താരം പ്രിയങ്ക ചോപ്ര ഒരുങ്ങുന്നു. 2026-ലെ 98-ാമത് അക്കാദമി അവാർഡ് ചടങ്ങിൽ പുരസ്കാരങ്ങൾ സമ്മാനിക്കുന്ന അവതാരകരുടെ പട്ടികയിലാണ് പ്രിയങ്ക ഇടംപിടിച്ചത്. ഹോളിവുഡ് സൂപ്പർ താരങ്ങളായ റോബർട്ട് ഡൗണി ജൂനിയർ, ആൻ ഹാതവെ, ഗ്വിനെത്ത് പാൽട്രോ എന്നിവർക്കൊപ്പമാണ് പ്രിയങ്കയും വേദി പങ്കിടുന്നത്.

ലോസ് ഏഞ്ചൽസിലെ ഡോൾബി തിയേറ്ററിൽ 2026 മാർച്ച് 15-നാണ് അവാർഡ് ചടങ്ങ് നടക്കുക. അക്കാദമി പുറത്തുവിട്ട പുതിയ പട്ടികയിൽ പോൾ മെസ്കൽ, വിൽ ആർനെറ്റ് എന്നിവരും ഉൾപ്പെടുന്നു. ഇതിനോടകം തന്നെ അഡ്രിയാൻ ബ്രോഡി, ഹാവിയർ ബാർഡെം, ഡെമി മൂർ തുടങ്ങിയ പ്രമുഖരെ അവതാരകരായി പ്രഖ്യാപിച്ചിരുന്നു.

ഇതാദ്യമായല്ല പ്രിയങ്ക ഓസ്‌കർ വേദിയിൽ അവതാരകയാകുന്നത്. 2016-ലെ 88-ാമത് ഓസ്‌കർ ചടങ്ങിലും പ്രിയങ്ക പുരസ്കാരം സമ്മാനിച്ചിരുന്നു. കൂടാതെ ഗോൾഡൻ ഗ്ലോബ്, എമ്മി അവാർഡ് വേദികളിലും താരം സാന്നിധ്യമറിയിച്ചിട്ടുണ്ട്. 2023-ൽ ദീപിക പദുകോണും ഓസ്‌കർ അവതാരകയായി എത്തിയിരുന്നു.

നിലവിൽ പ്രിയങ്കയുടെ കരിയറിൽ വലിയ മുന്നേറ്റങ്ങളാണ് നടക്കുന്നത്. അടുത്തിടെ പുറത്തിറങ്ങിയ 'ദ ബ്ലഫ്' (The Bluff) എന്ന ചിത്രത്തിന് ശേഷം, എസ്.എസ് രാജമൗലി സംവിധാനം ചെയ്യുന്ന 'വാരണാസി' എന്ന ബിഗ് ബജറ്റ് ചിത്രത്തിലൂടെ തെലുങ്ക് സിനിമയിലും താരം അരങ്ങേറ്റം കുറിക്കുകയാണ്. മഹേഷ് ബാബുവും പൃഥ്വിരാജ് സുകുമാരനും പ്രധാന വേഷങ്ങളിൽ എത്തുന്ന ഈ ചിത്രം 2027 ഏപ്രിലിലാണ് റിലീസ് തീരുമാനിച്ചിരിക്കുന്നത്. കൂടാതെ പ്രശസ്തമായ 'സിറ്റാഡൽ' വെബ് സീരീസിന്റെ രണ്ടാം ഭാഗവും അണിയറയിൽ ഒരുങ്ങുന്നുണ്ട്.

ഇത്തവണത്തെ ഓസ്‌കർ നാമനിർദ്ദേശങ്ങളിൽ റയാൻ കൂഗ്ലറുടെ 'സിന്നേഴ്സ്' (Sinners) 16 നാമനിർദ്ദേശങ്ങളുമായി ചരിത്രം കുറിച്ചിട്ടുണ്ട്. സിനിമാ ലോകം മുഴുവൻ ഉറ്റുനോക്കുന്ന ഈ പുരസ്കാര രാവിൽ പ്രിയങ്കയുടെ സാന്നിധ്യം ഇന്ത്യൻ ആരാധകർക്കും അഭിമാനകരമായ നിമിഷമാണ്.