തെന്നിന്ത്യൻ സിനിമാപ്രേമികൾ ഏറെ നാളായി കാത്തിരിക്കുന്ന സൂര്യ-തൃഷ കൂട്ടുകെട്ടിന്റെ ബിഗ് ബജറ്റ് ചിത്രം 'കറുപ്പ്' റിലീസിന് ഒരുങ്ങുന്നു. ആർ.ജെ. ബാലാജി സംവിധാനം ചെയ്യുന്ന ഈ ചിത്രം വരാനിരിക്കുന്ന തമിഴ് പുതുവർഷത്തോടനുബന്ധിച്ച് ഏപ്രിൽ 10-ന് ലോകമെമ്പാടുമുള്ള തിയേറ്ററുകളിൽ എത്തുമെന്നാണ് പുതിയ റിപ്പോർട്ടുകൾ. ഏറെക്കാലത്തിന് ശേഷം സൂര്യയും തൃഷയും വീണ്ടും ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്. നേരത്തെ ജനുവരിയിൽ റിലീസ് ചെയ്യാൻ നിശ്ചയിച്ചിരുന്ന ചിത്രം, പോസ്റ്റ് പ്രൊഡക്ഷൻ ജോലികളിലെ കാലതാമസവും വമ്പൻ ചിത്രങ്ങളുമായുള്ള ബോക്സ് ഓഫീസ് ഏറ്റുമുട്ടൽ ഒഴിവാക്കാനുമാണ് ഏപ്രിലിലേക്ക് മാറ്റിയത്. ഏപ്രിൽ 10-ന് ചിത്രം റിലീസ് ചെയ്യുന്നതിലൂടെ തമിഴ് പുതുവർഷത്തോടനുബന്ധിച്ചുള്ള അവധി ദിനങ്ങൾ സിനിമയ്ക്ക് വലിയ രീതിയിൽ ഗുണം ചെയ്യുമെന്നാണ് അണിയറപ്രവർത്തകർ കണക്കാക്കുന്നത്.

ചിത്രത്തിന്റെ പശ്ചാത്തല സംഗീത ജോലികൾ അതിവേഗം പുരോഗമിക്കുകയാണെന്ന് സംഗീത സംവിധായകൻ സായ് അഭ്യങ്കർ അടുത്തിടെ നടന്ന ഒരു ചടങ്ങിൽ വ്യക്തമാക്കി. നമ്മുടെ സംസ്കാരത്തെ പ്രതിഫലിപ്പിക്കുന്ന വേറിട്ട ശബ്ദങ്ങളാണ് സിനിമയ്ക്കായി ഉപയോഗിച്ചിരിക്കുന്നതെന്നും അദ്ദേഹം പറഞ്ഞു. 'ഡ്യൂഡ്' എന്ന ഹിറ്റ് ചിത്രത്തിലൂടെ ശ്രദ്ധേയനായ സായ് അഭ്യങ്കറിന്റെ സംഗീതം 'കറുപ്പി'ന്റെ പ്രധാന ആകർഷണമായിരിക്കും. സിനിമയെക്കുറിച്ച് അമിതമായ ഹൈപ്പ് നൽകാതെ റിലീസ് ചെയ്യാനാണ് താൻ ആഗ്രഹിക്കുന്നതെന്ന് സംവിധായകൻ ആർ.ജെ. ബാലാജി പറഞ്ഞു. വലിയ പ്രതീക്ഷകൾ നൽകുന്നത് പ്രേക്ഷകർക്കിടയിൽ തെറ്റായ ധാരണകൾ ഉണ്ടാക്കാൻ കാരണമാകുമെന്നും, അതിനാൽ കൃത്യമായ സമയത്ത് മാത്രം ചിത്രത്തിന്റെ പ്രൊമോഷൻ ആരംഭിക്കുമെന്നും അദ്ദേഹം വ്യക്തമാക്കി.

പ്രകാശ് രാജും പ്രധാന വേഷത്തിലെത്തുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് ആർ.ജെ. ബാലാജിയും സംഘവുമാണ്. സൂര്യയുടെ കഴിഞ്ഞ കുറച്ചു ചിത്രങ്ങൾ ബോക്സ് ഓഫീസിൽ വേണ്ടത്ര ചലനം സൃഷ്ടിക്കാത്തതിനാൽ, 'കറുപ്പി'ലൂടെ ഒരു ശക്തമായ തിരിച്ചുവരവ് നടത്താനാകുമെന്ന പ്രതീക്ഷയിലാണ് ആരാധകർ. സൂര്യ-തൃഷ കെമിസ്ട്രി വീണ്ടും സ്ക്രീനിൽ കാണാനുള്ള ആവേശത്തിലാണ് തമിഴ്, മലയാളം സിനിമാ ലോകം.