കന്നഡ താരം യഷിന്റെ ബിഗ് ബജറ്റ് ചിത്രം 'ടോക്സിക്കി'നായി കാത്തിരുന്ന ആരാധകർക്ക് ചെറിയൊരു നിരാശയുണ്ടെങ്കിലും തെലുങ്ക് സൂപ്പർ താരം പവൻ കല്യാണിന്റെ ആരാധകർക്ക് ഇത് ആഘോഷത്തിനുള്ള സമയമാണ്. മാർച്ച് 19-ന് റിലീസ് ചെയ്യാനിരുന്ന ടോക്സിക്കിന്റെ റിലീസ് തീയതി മാറ്റിയതോടെ, അതേ ദിവസം തന്നെ പവൻ കല്യാൺ ചിത്രം 'ഉസ്താദ് ഭഗത് സിംഗ്' തിയേറ്ററുകളിൽ എത്തുമെന്ന് പ്രഖ്യാപിച്ചിരിക്കുകയാണ്.

മിഡിൽ ഈസ്റ്റിലെ രാഷ്ട്രീയ അനിശ്ചിതത്വങ്ങളും ഇറാൻ-ഇസ്രായേൽ സംഘർഷങ്ങളും കാരണമാണ് ടോക്സിക്കിന്റെ റിലീസ് നീട്ടിവെക്കാൻ അണിയറപ്രവർത്തകർ തീരുമാനിച്ചത്. ഗീതു മോഹൻദാസ് സംവിധാനം ചെയ്യുന്ന ടോക്സിക് ഇനി ജൂൺ നാലിനായിരിക്കും പ്രേക്ഷകരിലേക്ക് എത്തുക. ഈ സാഹചര്യത്തിലാണ് ഹരീഷ് ശങ്കർ സംവിധാനം ചെയ്യുന്ന പവൻ കല്യാൺ ചിത്രം മാർച്ച് 19-ന് എത്തുമെന്ന് ഉറപ്പിച്ചത്.

ഒരു മാസ് ആക്ഷൻ എന്റർടെയ്‌നറായ ഉസ്താദ് ഭഗത് സിംഗിൽ പവൻ കല്യാൺ ശക്തനായ പോലീസ് ഓഫീസറുടെ വേഷത്തിലാണ് എത്തുന്നത്. ശ്രീലീലയും രാശി ഖന്നയുമാണ് ചിത്രത്തിലെ നായികമാർ. ദേവി ശ്രീ പ്രസാദ്, തമൻ എന്നിവർ സംഗീതം നിർവ്വഹിക്കുന്ന ചിത്രം വലിയ പ്രതീക്ഷയോടെയാണ് സിനിമാലോകം ഉറ്റുനോക്കുന്നത്. നയൻതാര, കിയാര അദ്വാനി തുടങ്ങിയ വൻ താരനിര അണിനിരക്കുന്ന ടോക്സിക്, യഷിന്റെ കരിയറിലെ 19-ാം ചിത്രമാണ്. ഗീതു മോഹൻദാസിന്റെ ആദ്യ പാൻ ഇന്ത്യൻ സംരംഭം കൂടിയായ ഈ ചിത്രത്തിന്റെ ടീസറുകൾ ഇതിനോടകം തന്നെ വലിയ തരംഗം സൃഷ്ടിച്ചിരുന്നു. എന്തായാലും മാർച്ച് മാസത്തിൽ പവൻ കല്യാണിന്റെ മാസ് പ്രകടനം കാണാനുള്ള ഒരുക്കത്തിലാണ് ആരാധകർ.