തെലുങ്ക് സൂപ്പർതാരം പവൻ കല്ല്യാണിന്റെ ഏറ്റവും പുതിയ ആക്ഷൻ ചിത്രം ‘ഉസ്താദ് ഭഗത് സിംഗ്’ ഒടിടി റിലീസിന് തയ്യാറെടുക്കുന്നു. ഏപ്രിൽ 16 മുതൽ പ്രമുഖ ഒടിടി പ്ലാറ്റ്‌ഫോമായ നെറ്റ്ഫ്ലിക്സിലൂടെ ചിത്രം പ്രേക്ഷകരിലേക്ക് എത്തും. സിനിമയുടെ സ്ട്രീമിംഗ് തീയതി നെറ്റ്ഫ്ലിക്സ് ഔദ്യോഗികമായി പ്രഖ്യാപിച്ചു കഴിഞ്ഞു.

ഹരീഷ് ശങ്കർ സംവിധാനം ചെയ്ത ഈ ചിത്രം തെലുങ്കിന് പുറമെ മലയാളം, തമിഴ്, കന്നഡ, ഹിന്ദി എന്നീ ഭാഷകളിലും ലഭ്യമാകും. ‘ഗബ്ബർ സിംഗിന്’ ശേഷം പവൻ കല്ല്യാണും ഹരീഷ് ശങ്കറും ഒന്നിക്കുന്നു എന്ന പ്രത്യേകതയോടെയാണ് ചിത്രം പുറത്തിറങ്ങിയത്. തമിഴ് ചിത്രം ‘തെരി’യുടെ റീമേക്ക് ആണെങ്കിലും തെലുങ്ക് പ്രേക്ഷകരെ തൃപ്തിപ്പെടുത്തുന്ന രീതിയിലുള്ള മാറ്റങ്ങളോടെയാണ് ചിത്രം അണിയിച്ചൊരുക്കിയത്.

നല്ലമല കാടിന്റെ പശ്ചാത്തലത്തിൽ ഒരു മുൻ പോലീസ് ഉദ്യോഗസ്ഥന്റെ കഥയാണ് ചിത്രം പറയുന്നത്. പവൻ കല്ല്യാണിന്റെ മാസ് പ്രകടനത്തിനൊപ്പം ശ്രീലീല, റാഷി ഖന്ന എന്നിവരാണ് നായികമാരായി എത്തിയത്. തമിഴ് നടൻ ആർ. പാർത്ഥിപൻ ചിത്രത്തിൽ വില്ലൻ വേഷം കൈകാര്യം ചെയ്യുന്നു. ദേവി ശ്രീ പ്രസാദ് പാട്ടുകൾക്കും തമൻ എസ് പശ്ചാത്തല സംഗീതത്തിനും നിർവ്വഹിച്ച സംഗീതം ചിത്രത്തിന് വലിയ ആവേശം പകർന്നിരുന്നു.

ആന്ധ്രാപ്രദേശ് ഉപമുഖ്യമന്ത്രിയായി പവൻ കല്ല്യാൺ ചുമതലയേറ്റ ശേഷം പുറത്തിറങ്ങിയ സിനിമ എന്ന നിലയിൽ വലിയ പ്രതീക്ഷകളാണ് ‘ഉസ്താദ് ഭഗത് സിംഗിന്’ നൽകിയിരുന്നത്. മാർച്ചിൽ തിയേറ്ററുകളിൽ റിലീസ് ചെയ്ത ചിത്രത്തിന് ബോക്സ് ഓഫീസിൽ സമ്മിശ്ര പ്രതികരണമാണ് ലഭിച്ചത്. എന്നാൽ ഒടിടി റിലീസിലൂടെ പാൻ-ഇന്ത്യൻ തലത്തിൽ വലിയൊരു പ്രേക്ഷക സമൂഹത്തിലേക്ക് ചിത്രം എത്തുമെന്ന പ്രതീക്ഷയിലാണ് അണിയറ പ്രവർത്തകർ. മൈത്രി മൂവി മേക്കേഴ്സാണ് ചിത്രം നിർമ്മിച്ചിരിക്കുന്നത്.