കെ.ജി.എഫിന് ശേഷം സിനിമാ ലോകം ഒന്നടങ്കം കാത്തിരിക്കുന്ന യാഷ് ചിത്രം 'ടോക്സിക്: എ ഫെയറി ടെയിൽ ഫോർ ഗ്രോൺ അപ്‌സ്' (Toxic: A Fairy Tale For Grown-Ups) റിലീസ് തീയതി നീട്ടി. ഒറിജിനൽ ഷെഡ്യൂൾ പ്രകാരം മാർച്ച് 19-ന് എത്തേണ്ടിയിരുന്ന ചിത്രം ഇനി 2026 ജൂൺ 4-നാകും തിയേറ്ററുകളിലെത്തുക. ഇതോടെ ബോളിവുഡ് താരം വരുൺ ധവാന്റെ 'ഹേ ജവാനി തോ ഇഷ്ഖ് ഹോനാ ഹേ' എന്ന ചിത്രവുമായി ടോക്സിക് ബോക്സ് ഓഫീസിൽ ഏറ്റുമുട്ടും.

പശ്ചിമേഷ്യയിലെ നിലവിലെ രാഷ്ട്രീയ സാഹചര്യങ്ങളും സംഘർഷാവസ്ഥയുമാണ് ചിത്രത്തിന്റെ റിലീസ് നീട്ടാൻ പ്രധാന കാരണമായി നിർമ്മാതാക്കൾ ചൂണ്ടിക്കാട്ടുന്നത്. ആഗോള പ്രേക്ഷകരെ ലക്ഷ്യമിട്ട് കന്നഡയിലും ഇംഗ്ലീഷിലും ഒരുക്കുന്ന ചിത്രമായതിനാൽ, വിദേശ വിപണിയിലെ അനിശ്ചിതത്വം ഒഴിവാക്കാനാണ് ഈ തീരുമാനമെന്ന് യാഷ് ഔദ്യോഗിക പ്രസ്താവനയിലൂടെ വ്യക്തമാക്കി. പ്രൊഡക്ഷൻ ജോലികൾ വൈകിയതുകൊണ്ടല്ല, മറിച്ച് പങ്കാളികളുടെയും വിതരണക്കാരുടെയും താത്പര്യം സംരക്ഷിക്കാനാണ് മാറ്റമെന്നും അദ്ദേഹം കൂട്ടിച്ചേർത്തു.

റിലീസ് തീയതികൾ തമ്മിലുള്ള ഈ ഏറ്റുമുട്ടലിനെക്കുറിച്ച് കെവിഎൻ (KVN) പ്രൊഡക്ഷൻസ് പ്രതികരിച്ചു. വരുൺ ധവാൻ ചിത്രത്തിന്റെ അണിയറപ്രവർത്തകരുമായി തങ്ങൾ സംസാരിച്ചിട്ടുണ്ടെന്നും തികച്ചും സൗഹൃദപരമായ അന്തരീക്ഷത്തിലാണ് ചർച്ചകൾ നടന്നതെന്നും അവർ അറിയിച്ചു. ഡേവിഡ് ധവാൻ സംവിധാനം ചെയ്യുന്ന ചിത്രത്തിന്റെ അണിയറപ്രവർത്തകർക്ക് റിലീസ് തീയതിയിലെ മാറ്റത്തെക്കുറിച്ച് മുൻകൂട്ടി അറിവുണ്ടായിരുന്നുവെന്നും അവർ വ്യക്തമാക്കി.

ഗീതു മോഹൻദാസ് സംവിധാനം ചെയ്യുന്ന 'ടോക്സിക്' വലിയ ബജറ്റിൽ ഒരുങ്ങുന്ന ആക്ഷൻ ത്രില്ലറാണ്. അതേസമയം, വരുൺ ധവാന്റെ ചിത്രം ഒരു റൊമാന്റിക് കോമഡിയാണ്. രണ്ട് വലിയ ചിത്രങ്ങൾ ഒരേ ദിവസം എത്തുമ്പോൾ ബോക്സ് ഓഫീസിൽ കടുത്ത മത്സരം ഉണ്ടാകുമെന്നുറപ്പാണ്. മിഡിൽ ഈസ്റ്റിലെ സാഹചര്യം മെച്ചപ്പെടുന്നതോടെ ജൂണിൽ ചിത്രം ലോകമെമ്പാടും ബൃഹത്തായ രീതിയിൽ റിലീസ് ചെയ്യാനാണ് അണിയറപ്രവർത്തകരുടെ പ്ലാൻ.