മലയാളത്തിന്റെ പ്രിയ താരം അനശ്വര രാജൻ കേന്ദ്രകഥാപാത്രത്തെ അവതരിപ്പിക്കുന്ന ഏറ്റവും പുതിയ ചിത്രം 'വിത്ത് ലൗവ്' ഒടിടി പ്ലാറ്റ്‌ഫോമായ നെറ്റ്ഫ്ലിക്സിൽ റിലീസ് ചെയ്തു. തിയറ്ററുകളിൽ മികച്ച പ്രതികരണം നേടിയ ഈ റൊമാന്റിക് കോമഡി എന്റർടെയ്നർ ഇപ്പോൾ പ്രേക്ഷകർക്ക് വീട്ടിലിരുന്ന് ആസ്വദിക്കാം. തമിഴ്, തെലുങ്ക്, ഹിന്ദി, മലയാളം എന്നീ നാല് ഭാഷകളിലായാണ് ചിത്രം ഒടിടിയിൽ ലഭ്യമാക്കിയിരിക്കുന്നത്.

സൗന്ദര്യ രജനികാന്ത് നിർമ്മിച്ച ഈ ചിത്രം സംവിധാനം ചെയ്തിരിക്കുന്നത് നവാഗതനായ മധൻ ആണ്. 'ടൂറിസ്റ്റ് ഫാമിലി' എന്ന സിനിമയിലൂടെ ശ്രദ്ധേയനായ അഭിഷൻ ജീവിന്തും അനശ്വര രാജനുമാണ് ചിത്രത്തിൽ പ്രധാന വേഷങ്ങൾ കൈകാര്യം ചെയ്യുന്നത്. ചിത്രത്തിൽ 'മോനിഷ' എന്ന കഥാപാത്രത്തെയാണ് അനശ്വര അവതരിപ്പിക്കുന്നത്. ഹരീഷ് കുമാർ, കാവ്യ അനിൽ, സച്ചിൻ, തേനി മുരുകൻ തുടങ്ങിയ വൻ താരനിരയും സിനിമയുടെ ഭാഗമാണ്.

യുവത്വത്തിന്റെ പ്രണയവും തമാശകളും കോർത്തിണക്കിയ ചിത്രം തിയറ്ററുകളിൽ വലിയ വിജയമായിരുന്നു. തമിഴ് സിനിമയിൽ അനശ്വരയുടെ സാന്നിധ്യം ശ്രദ്ധിക്കപ്പെട്ട ചിത്രങ്ങളിൽ ഒന്നുകൂടിയാണിത്. ഒടിടി റിലീസ് കാത്തിരുന്ന സിനിമാ പ്രേമികൾക്ക് വലിയൊരു വിരുന്നാണ് നെറ്റ്ഫ്ലിക്സ് ഇതിലൂടെ നൽകിയിരിക്കുന്നത്. അനശ്വരയുടെ മികച്ച പ്രകടനവും ചിത്രത്തിന്റെ ലളിതമായ ആഖ്യാനശൈലിയും കൂടുതൽ പ്രേക്ഷകരിലേക്ക് എത്താൻ ഈ ഡിജിറ്റൽ റിലീസ് സഹായിക്കുമെന്നാണ് വിലയിരുത്തപ്പെടുന്നത്.